22.78° Clear
Kies jou weergawe:

Marnique Hibbert

As jy jouself nog nie die guns gedoen het om een van die vyf Helpmekaar-tienertoneelproduksie te gaan kyk nie, moet jy beslis jou dagboek nadertrek. Talent is dié jaar volop – nie net op die verhoog nie, maar ook agter die skerms.

 

Vyf Helpmekaar-produksies neem deel aan die jaarlikse Pronk Podium (8-13 Julie) en aan die ATKV-tienertoneelkompetisie (24 Julie-4 Augustus). Een van die stukke, Forté, onder regie van Me Linda van Niekerk, sal ook te sien wees by die Reza-toneelfees in Bloemfontein. Volgens Van Niekerk is tienertoneel ‘n wonderlike platform vir Helpies wat die toneel-, film- of televisiewêreld wil betree.

 

Twee van die produksies is deur Helpies geskryf. Mia Steenekamp (gr.10) se stuk, “Mooi”, en Zanri Swanepoel (gr.11) se toneelstuk, “Verlate Sterrestof”, getuig volgens Van Niekerk hope skryftalent.

 

Tienertoneelstukke handel oor aktuele sake en raak die gehoor se hartsnare. Steenekamp se stuk gaan oor die gevare van dieëtsiektes en hoe tieners dikwels verwronge idees oor hulle liggame het. “Ek dink nie tieners besef hoe mooi hulle eintlik is nie,” sê Steenekamp. “Mense, veral tieners, moet verstaan dat jy jouself kan lief hê, al is jy hoe vet of maer! Jy het net een lyf, hê hom lief.”

 

“Ek het baie geleer uit die proses en baie nuwe mense leer ken,” vertel Swanepoel. Sy sê ook dat dit gepaardgegaan het met min slaap, harde werk en baie ure, maar dat alles die moeite werd was om haar stuk op die planke te kry.

 

Karla Jonker

“C’était détendu, mais il y a eu sans doute une facteur X!” of in Afrikaans gesê: “Dit was ontspanne, maar daar was defnitief ‘n X-faktor!”is hoe Me Aritha Kruger, senior Franse onderwyseres, die jaarlikse Franse Soirée beskryf.

Die tradisie van ‘n Franse aand kom al van 2008 af, met elke jaar se Franse matriekgroep aanstuur van sake. Die tema van hierdie jaar se Soirée was: “Tout sonnes mieux en français – Alles klink beter in Frans”. Die gaskunstenaar was Philomène, ‘n groep wat die gaste met kunstige Franse liedere vermaak het. Die spreker was Olivia Loots, wat haar storie kom deel het oor hoe sy in Frankryk gaan werk het na haar matriekjaar en die boeke, “ek. Frankryk. 246 dae” en “my France”,  wat sy oor haar wedervaringe geskryf het.

Die idee van ‘n straattoneel is beklemtoon deur egte Franse dekor, ‘n mimmiekkunstenaar, Bianca Coetzee, en strelende musiek trekklavierspel deur Nico Olivier. Die tipies Franse vingerhappies wat deur die koshuischef, Chris van Niekerk, gemaak is, was vingerleklekker. Of soos daar in Frans gesê word: magnifique!

“Vir my is die heel lekkerste deel van die aan, om al die grade se items te sien en om self ook op te tree,” sê Mia Louw (gr.11). Die tradisie word voortgesit dat die Franse leerders in graadverband ‘n item lewer. Die graad 8-leerders het hierdie jaar ‘n Franse weergawe van ‘n Disney-lied gesing. Die graad 9’s het ‘n tradisionele volksdans, La Bastringue, opgevoer. Die graad 11’s het die Onse Vader (Le Notre père) met bewegings voorgedra. Individuele leerders het ook ander items gelewer.

Die Franse Soirée is werklik elke jaar ‘n aand om na uit te sien en ‘n geleentheid om die Franse kultuur op ‘n kreatiewe wyse te vier. Célébrons le français!

 

Marié Mouton

Charl du Toit, beter bekend as @chxrlmusic op Instagram, steel al vir die afgelope paar jaar verskeie Helpies se harte met sy musiek. Meer onlangs het sy roerende sangstem ook meer harte ver van sy tuisland aangeraak. Charl het gedurende sy Desembervakansie tyd spandeer in die plek waar die sterre van die toekoms gebore word – Los Angeles.

Hy is deur KYN Entertainment, een van die musiekbedryf se suksesvolste agentskappe, wat onder meer verantwoorderlik is vir die suksesstories van bekende groepe soos One Direction en Little Mix, genader. Hul was beïndruk deur sy musiekvideo op Instagram van Billie Eilish se treffer, “Hostage”. Du Toit se video het tot hede amper 1 miljoen besigtigings gehad.

Du Toit het die tyd in LA gebruik om lirieke te skryf en liedjies op te neem en het in hierdie tyd 8 komposisies voltooi. Hy beskryf die atmosfeer in Hollywood as “baie kreatief met ‘n paar crazies’’.

Du Toit vind dit moeilik om tegelykertyd ‘n matrikulant by Helpmekaar Kollege te wees en tyd aan sy musiekloopbaan te bestee. “Sekere tye neem die skoolwerk baie tyd en energie in beslag terwyl ek natuurlik eerder wil musiek maak.” Hy glo definitief nie in ‘n plan B nie. Vir Du Toit beteken ware geluk om sy liefde en talent vir musiek te kan uitleef.

Sy planne vir die res van 2019 is om twee van sy eie enkelsnitte op alle media-platforms, insluitend Apple Music, beskikbaar te stel. Volgende jaar gaan hy al sy tyd aan musiek spandeer en tussen Amerika en Suid-Afrika reis om sy passie ten volle te kan uitleef.

Baie mense vra Du Toit hoe hy genoeg selfvertroue kry om sy musiek aan die publiek te kan oordra. Sy antwoord hierop is doodeenvoudig: “As iets werklik jou passie is, maak dit nie regtig saak wat mense van jou of daarvan dink nie.” Hy waarsku egter ook dat die musiekwêreld ‘n veeleisende industrie is wat baie uithouvermoë verg: “Moenie te vinnig die handdoek ingooi nie –op die ou end is alles die moeite werd.”

 

Vinnige Vrae:

V: Gunsteling sangers?

A: Daars heeltemal te veel. Jeremy Zucker, EDEN, Finneas.

V: Jou gunstelingliedjie op die oomblik?

A: Angels – Finneas

V: Klerestyl?

A: Grunge. Ek het soveel swart klere in my kas!

V: Rolmodel?

A: John Mayer

V: Watter instrumente speel jy?

A: Klavier, kitaar, dromme, ukulele en die mondfluitjie (as dit tel!)

Anja Steyn

Die Helpie-koor het vanjaar ‘n nuwe koormeester aan die stuur van sake. Mnr Ruan Odendaal is al vir 14 jaar in die koorwêreld betrokke en die koor se vordering tot by die 2019 ATKV-Applouskoorkompetisie se landsfinaal spreek boekdele oor hiérdie koorleier se bekwaamheid.

 

Odendaal het reeds groot planne vir die koor. “Ons beoog om in 2020 aan die Wêreld Koorspele in België deel te neem.” Hy is van mening dat die tipe kind in die koor, dít is wat die koor spesiaal maak. Uniekheid is vir dié koorleier van kardinale belang. “Ons strewe altyd daarna om uniek te bly.” Hy beklemtoon verder die belangrikheid van koorsang aangesien dit vir mense leer hoe om in ‘n span saam te werk en vriendskappe wat in ‘n koor gesmee word, ‘n leeftyd lank hou.

 

Dit is ook duidelik dat Odendaal ‘n liefde vir musiek het. “Musiek is kos vir die siel. As jy in ‘n koor sing, kry jy ‘n driegang-maaltyd.” Hy is verder van mening dat positiewe energie en harde werk belangrike boublokke is in die skep van ‘n goeie koor. “Dit hang alles af van hoeveel almal inkoop.”

 

Odendaal vertel dat koormusiek konstant besig is om te verander en hy glo dat dít daartoe lei dat koorsang altyd groei. “Kore begin meer en meer populêre musiek sing. Dit is lekker vir die sangers en die gehoor.” Die Helpies is vroeër vanjaar verras toe die koor tydens saalopening van die bekende groep, Spoegwolf, se musiek gesing het.

 

Lafras Beukes (gr.8) geniet dit baie om in die koor te sing. “Om in die koor te sing, is altyd ‘n lekker ervaring, veral omdat almal so vriendelik is. En al oefen ons baie hard, bly kooroefeninge ‘n wegbreek van al die ander aktiwiteite in die week.” Hy kan ook nie uitgepraat raak oor Odendaal nie. “Mnr Ruan is die beste koorleier by wie ek nog gesing het. Hy is hardwerkend en stel die koor eerste. Dit tel in ons guns,” sê Beukes.

Flinkpraters maak stem dik

Is jy ‘n mens wat hou daarvan om te praat tot die stoom by jou ore uitkom? Word jy gefrustreerd as jou ouers jou vra om stil te bly wanneer jy jou mening wil lig? Wel, dan is debat vir jou!

Debat is ‘n plek waar jy KAN terugpraat. In teendeel, jy MOET terugpraat! Anders as by die huis, is die debatomgewing ‘n plek waar tieners hulle vurige argumente en veelbesproke standpunte kan rondgooi sonder om in die moelikheid te beland.

Dit blyk dat heelwat Hepies lus het vir praat hierdie jaar. Twee en vyftig Helpies het die debatkursus en -spanuitdunne op 18 en 19 Januarie bygewoon.

Die uitdunne is op ‘n “dink-of-sink”-wyse gehou. Leerlinge het slegs tien minute gehad om in hulle spanne, bestaande uit drie lede, argumente oor die tema voor te berei. Die junior leerders (gr. 8 en 9) moes die debat-eksperts, dit is nou die onnies, oorreed waarom sosiale media voordelig (of nadelig) vir Suid-Afrika se tieners is. So kon hulle sien of ‘n leerlinge op sy of haar voete kan dink onder dieselfde tipe druk as wat by ‘n kompetisie ervaar word.

Me. Adelia Murry, Helpmekaar se debat-organiseerder, reken dat debat jou op vele terreine help en jou voorberei vir situasies waar jy jou mening moet lig of selfs in ‘n spannningsvolle situasie soos ‘n werksonderhoud.

Die ATKV-tienertoneelkompetisie kweek ’n liefde vir toneelskepping in Afrikaans, geneem deur Pieter Hougaard.

Kultuur agter die skerms:

ATKV-tienertoneelkompetisie

Jené Becker

Die ATKV-tienertoneelkompetisie kweek ’n liefde vir toneelskepping in Afrikaans, toneelspel en teater-kyk by hoërskoolleerders. Helpmekaar se Tienertoneel-kenner, mnr. Eghard Basson, lig die sluier oor die wat in voorbereiding vir dié kompetisie:

Helpieflitse: Hoe lank neem dit om ‘n teks te skryf vir Tienertoneel en wat is ‘n paar tegniese reëls vir Tienertoneel?

Mnr Eghard:   Elke teks is uniek en dit hang af van die styl, genre en inspirasie. Sekere

stories word makliker ontgin as ander. Tekste moet tussen 20-45 min lank wees. Styl en genre maak nie saak nie.

Helpieflitse: Hoe lank oefen ‘n Tienertoneel produksie voor die optredes?

Mnr. Eghard:  Ons het reeds in Februarie begin en dan rond ons af in die April-vakansie en veral in die Julie-reses.

Helpieflitse: Watter tipe leerder neem deel aan Tienertoneel?

Mnr. Eghard:  My ervaring is dat dit ‘n goed gebalanseerde leerder is, maar elke jaar

verbaas die Helpies my met verborge talente en kan ek nie ‘n etiket plaas op

jou tipiese toneelkind nie.

Helpieflitse: Wat is die moeilikste uitdaging in Tienertoneel?

Mnr. Eghard:  Om repetisies vas te maak, want eweskielik het een akteur/aktrise ‘n swem-talent oor die Desember-vakansie ontwikkel en nou beperk dit ons oefentye (tong in die kies)

Helpieflitse:  Enige raad vir die aspirante Tienertoneel-deelnemers?

Mnr.Eghard:   Aan elke Helpie: moenie ontmoedig word deur elke jaar te oudisie nie – elke jaar is die storie nuut en die verwagtinge dus anders. Kom voorbereid, leer jou woorde uit jou kop en kom vermaak die paneel: dis jou oomblik om aan ons te bewys wat in jou steek! Miskien is 2020 jou jaar!

Die seniorafdeling is gewen deur Micke Coetzee, Pascale Viviers, Jane (akkuut op die e asb) en Yashna Higgens.

Spanne gesels dat die spoeg spat

Cara Kotzé

Spraakgilde (deelname in Afrikaans) en speech guild (deelname in Engels) is die ideale geleentheid vir ‘n span van vier deelnemers om hul opinies op ‘n formele manier aan ‘n gehoor oor te dra, in Afrikaans en Engels onderskeidelik. ‘n Toespraak van 15 minute word geskryf oor ‘n onderwerp van die span se keuse, waarin dié  span hulle standpunt moet oordra.

Volgens me. Nadia van der Merwe is die temas van die toesprake lekker uiteenlopend. Een span bekla die lot van graad 9’s, terwyl ‘n ander span krities staan teenoor “helikopter-ouers”.

Helpmekaar het hierdie jaar ‘n totaal van 16 spraakgilde spanne, wat almal op Maandag 11 Maart aan die eerste spraakgilde-kompetisie sal deelneem teen ander hoërskole wat insluit: Randburg, Jeugland en Bastion. Helpies het ook met speech guild in die voorbereide- en onvoorbereide afdelings deelgeneem. Geen uitslae is al ontvang nie.

Bernice Joubert (gr.10) geniet speech guild geweldig en voel dat dit baie voordele inhou. Sy sê:  “Met die impromptu speech guild wat ek gedoen het, leer dit jou om onder druk op jou voete te dink!”

Vanjaar se produksie, getiteld,“Die Republiek van Helpmekaar”, het die storie vertel van hoe uiteenlopende reisigers deur die wêreld toer, almal opsoek na hulle eie “paradys” wat eindelik geneem deur Ruben Barnardt.

Groentjiekonsert groot sukses

Cara Kotzé

Vrydagaand, 11 Januarie, na ‘n lang en uitputtende week van “blaf-tot-die-boom-vir-jou-terugblaf” en om te “dans-soos-ʻn-piesang” was vanjaar se graad agt-groentjiekonsert die informele inhuldiging van Welpie tot Helpie. Elke Welpie was deel van dié vermaaklike opvoering wat geskryf, gechoreografeer en geredigeer is deur Helpmekaar se graad 12-dramastudente.

Vanjaar se produksie, getiteld,“Die Republiek van Helpmekaar”, het die storie vertel van hoe uiteenlopende reisigers deur die wêreld toer, almal opsoek na hulle eie “paradys” wat eindelik net by Helpmekaar gevind kon word. Die vertoning, waarvoor daar net een middag geoefen is, het die vertellings slim verveef met nie minder nie as 15 danse.

Marie Mouton, (gr. 12) die skrywer van die produksie, sê dat sy dit baie geniet het om saam met mede-klasmaat, Charl du Toit aan die produksie te werk. en is trots op almal wat betrokke was. “Te danke aan ons hardwerkende toneelgeselskap en ook die matrieks wat agter die skerms gewerk het, was die vertoning ‘n groot sukses. Die graad 8-hoofkarakters met wie ons gewerk het, het almal hulle deel gedoen voor die tyd en het werklikwaar hulle beste gelewer op die aand van die vertoning.” Sy voeg by dat vir haar groot pret was om saam met die graad agt’s te werk en hulle beter te leer ken.

Regisseur van die groentjiekonsert, Charl du Toit (gr. 12) is ook baie tevrede met die eindproduk. “Hulle spel het definitief hulle ouderdom oortref. Hulle het natuurlike aanvoeling gehad vir hulle rolle, en ons kon sien hulle het moeite gedoen.”

Vir die graad agt’s was dit ook ‘n spesiale geleentheid. “Dit was iets wat ek nooit sal vergeet nie, ek het nuwe vriende ontmoet en ‘n fantastiese aand gehad!” vertel Lisa Loubser (gr 8).

Volg die skakel om vir jou gunsteling dans te stem:

[E-Flitse, asb sit ‘n skakel in wat na HMK24 gaan, waar die Helpies kan stem vir hulle gunsteling groentjiekonsert-dans]