20.56° Clouds
Kies jou weergawe:

Helpmekaar Rocco se nuwe BFF

Karla Jonker

Die bekende pianis, Rocco de Villiers, is nie net deel van die vriende van Helpmekaar nie.  Hy beskou Helpmekaar as sy nuwe BFF na afloop van die jaarlikse modeparade wat vanjaar by die eksklusiewe Rand Club in Johannesburg plaasgevind het.

Helpmekaar Kollege se modeparade is elke jaar ‘n spoggeleentheid waarin graad 11 en 12-leerders pronk as modelle vir Suid-Afrikaanse modeontwerpers. Ander senior leerders is op hul beurt kelners tydens die verigtinge.

Met De Villiers op die klawers en Lizelle le Roux op viool, het hulle die musiek gemaak waarop die modelle die uitrustings ten toon gestel het. “Dit was ‘n eerste en dit was fantasties! En ‘n hoogtepunt as deel van die viering van my 20-jarige loopbaan. Die idee het van die organiseerders gekom,” vertel De Villiers. Van die Helpie-modelle het geloop in sý twintig gunsteling kostuums van die laaste twintig jaar van sy loopbaan. “Eerstens moet ek noem dat dit niks met mode uit te waai het nie. Dit is dikwels idees wat ek gehad het of iewers gesien het, dan na ‘n ontwerper geneem het en gevra het om dit ‘n Rocco-kwaliteit te gee. Al die ontwerpers is Suid-Afrikaans, aangesien ek daarin glo om plaaslike talent te ondersteun.”

De Villiers se styl word gekenmerk aan sy oorspronklike uitrustings en die swierige blom wat deel daarvan uitmaak. Dié blomme maak nie net ‘n impak nie, maar het ook ‘n dieper betekenis: “Die blom op al my uitrustings is ‘n ode aan my ma wat in 2010 oorlede is. Sy was ‘n statige vrou en het nooit die huis verlaat sonder ‘n mooi uitrusting wat altyd afgerond was met ‘n reuse blom op die skouer nie. Vandaar die idee wat ook intussen deel van my verhoogidentiteit geword het.”

Volgens De Villiers was 2019 se Helpie-modeparade ‘n reuse sukses en nog ‘n diamant in Helpmekaar se kroon. “Dit was stylvol, baie gepas vir die Rand Club en ‘n enorme sukses. Lizelle, my vioolspeler, en ek het onsself baie geniet. Daar was meer blomme as by ‘n staatsbegrafnis – maar dit het bygedra tot die swierigheid van die geleentheid. Die modes was mooi, maar ek dink daar was ruimte vir meer kleur en dalk ‘n kategorie met sport- of selfs swemklere. Dan sou hulle [die gehoor] nog harder gegil het!”

Die prag en praal van ‘n sprokiesverhaal

Megan Saaiman

10 Paartjies. Een gesogte titel. Een asemrowende sprokiesaand.

Jaarliks word die bekende sprokie, Beauty and the Beast, met ‘n bietjie Helpie-magic herskryf en op Donderdagaand 9 Mei 2019, het Beauty and the Beast na ure se voorbereiding vir die groot aand ‘n pragtige realiteit geword.

Op die aand het elke paartjie deelgeneem aan vier kategorieë, naamlik informele drag, die paartjie-dans, formele drag en die vraag-en-antwoord-sessie. 2019 se tema, “Hier is ek”, is geïnspireer deur The Greatest Showman. Die danse, klere en antwoorde moes die tema uitbeeld om werklik die deelnemers se towerkrag te wys.

Bekende sterre uit die mode- en vermaaklikheidswêreld, Cezanne Coetzee, Armand du Plessis, Elma Postma en Carien Botha was beoordelaars tydens die glansryke geleentheid.

Op die aand het Xanté de Klerk die beoordelaars se asems weggeslaan en sy is as Beauty gekroon. “Dit is ‘n uitdagende proses, maar op die ou end is al die insette die moeite werd!” sê De Klerk.

André Groenewald is aangewys as Beast. “Jy sal die ervaring nooit vergeet nie en dit is regtig net lekker,” vertel Groenewald na afloop van die kompetisie.

De Klerk het ook die titel van Mej Persoonlikheid verower. Keith Whitehead is as Mnr Persoonlikheid aangewys. Mej en Mnr Fotogenies gaan onderskeidelik aan Tamsyn Taylor en André Groenewald. 2de prinses en prins is Tamsyn Taylor en Adriaan Steyn en 1ste prinses en prins is Pascale Viviers en Zack van Zyl.

“Kreatiwiteit en selfvertrou het tydens die hele proses in elke kind gegroei,” sê hooforganiseerder Me Annemarie Venter.

 

Die helpie-atletiekspan bid voor die begin van die interhoër. Foto: Danielle Heyneke

Shane Lotriet

Op 27 Februarie 2019 het die Helpies soos een man aan die jaarlikse super-interhoër by die Ruimsig stadion deelgeneem. Die atlete van Helpmekaar het daarin geslaag om ʼn vierde keer die wennerstrofee vir die A-bond omhoog te hou en boonop voor die tuisskare van vanjaar se naaswenners, Prestige Kollege. In die voorafgaande twee jare moes die Helpies die knie buig voor die atlete van Prestige Kollege.

Helpmekaar het vanjaar hierdie oorwinning met 23 goue, 26 silwer en 22 brons medaljes behaal. Die gr. 8’s van Helpmekaar het ʼn treffende eerste indruk gemaak toe Zanique Swanepoel met ʼn tyd van 12.23 sekondes tweede geëindig het in die 100m-naelloop. Daarmee het sy 1 057 punte volgens die ABSA-tabel verwerf. Zanique het later ook ʼn goue medalje in die 200m-naelloop verwerf met ʼn tyd van 25.34 sekondes, wat aan haar ʼn puntetal van 1 051 besorg het.

Vroegoggend was dit al duidelik dat die meer as duisend Helpie-ondersteuners weer eens die berugte temperature wat die interhoër elke jaar kenmerk, sou moes trotseer toe die kwik tot 30˚C gestyg het.

“Wat hierdie wen vir my besonders maak, is die feit dat hierdie jaar se matrieks in 2015 as gr. 8’s kon beleef hoe Helpmekaar die interhoër wen, en vier jaar later wéér die voorreg het om die oorweldigend trots te voel,” sê Josh Stockigt, atletiekkaptein en matrikulant.

Op 6 Maart 2014 het Helpmekaar geskiedenis gemaak deur vir die eerste keer as wenners van die A-bond aangewys te word met ʼn oorwinning van 56 punte oor die hoërskool Monument. In 2015 vergroot Helpmekaar die punteverskil tot 78 met Monument steeds in die tweede plek.

Kempton Park het egter in 2016 die oorhand oor Monument gekry en sodoende die posisie van naaswenners ingeneem. Helpmekaar is toe vir die derde agtereenvolgende jaar as wenners aangewys. In hierdie jaar het Prestige Kollege die eerste keer die B-bond gewen.

In 2017 het die atletiekwiel egter gedraai toe die nuwelinge, Prestige Kollege, met hul eerste deelname aan die A-bond vir Helpmekaar met ʼn aansienlike punteverskil van 105 na die tweede plek laat skuif het ‒ ʼn prestasie wat hulle in 2018 herhaal het.

Die opwinding het dus behoorlik na vanjaar se byeenkoms opgebou.

Josh Stockigt se eweknie, Xanté de Klerk, beskryf die dag soos volg: “Asemwrowend. Dis al wat ek kan sê.”

Helpies gee met ʼn glimlag

Gemeenskapsdiens ‒ die gawe van uitreik

Shane Lottriet

 

By Helpmekaar word daar dikwels na die Helpie-familie verwys en hoe leerders na mekaar omsien as die nood druk. Hierdie sterk verweefde Helpie-familie is egter ook daarvan bewus dat hulle deel is van ʼn groter, meer diverse gemeenskap. Daarom skroom hulle nie om hul identiteit uit te leef en sodoende hul plig in die breër gemeenskap na te kom nie.

Helpmekaar is verantwoordelik vir ʼn menigte inisiatiewe en vorm deel van bestaande projekte wat na die gemeenskap in al sy diversiteit van unieke behoeftes uitreik. Onder die leiding van juffroue Carien Wessels, Karen Wissekerke en Helene Vermaak word daar onder andere uitgereik na bejaardes, kinders en diere wat werklik ʼn Helpie-hand nodig het.

Sommige projekte vind in sekere termyne plaas, terwyl ander regdeur die jaar plaasvind. Daar is altyd nog plek vir Helpies om hieraan deel te neem.

Een van hierdie projekte, “Meals on Wheels”, behels die insameling van leë houers vir hergebruik deur voedingskemas vir minderbevoorregtes. Vir hierdie doel is ʼn houer in juffrou Wessels se klas beskikbaar gestel waarin leerders en ouers die leë houers gerieflik kan plaas.

ʼn Ou bekende en gunsteling inisiatief is Parksorg wat een keer per maand op ʼn Woensdagmiddag plaasvind. Gedurende Valentynsweek skenk die Helpies blomme vir bejaardes, in die winter word warm klere en komberse uitgedeel en aan die einde van die jaar word kerspakkies versprei.

“Ons het almal ʼn plig om van mekaar te leer deur mekaar te help. Hiér is waar dit gebeur,” sê Anay Coetzee, portefeuljelid vir gemeenskapsdiens.